ನವದೆಹಲಿ: ಭಾರತೀಯ ಸೇನೆಗೆ ಇಂದಿನಿಂದ ಮತ್ತಷ್ಟು ಬಲ ಹೆಚ್ಚಿದೆ. ಜೋಧಪುರದಲ್ಲಿ ಆಯೋಜಿಸಲಾಗಿರುವ ಸಮಾರಂಭದಲ್ಲಿ ರಕ್ಷಣಾ ಸಚಿವ ರಾಜನಾಥ ಸಿಂಗ್ 15 ಲಘು ಯುದ್ಧ ಹೆಲಿಕಾಪ್ಟರ್‌ಗಳನ್ನ ಭಾರತೀಯ ವಾಯುಪಡೆಗೆ ಹಸ್ತಾಂತರಿಸಿದ್ದಾರೆ.
ದೇಶೀಯವಾಗಿ ನಿರ್ಮಿಸಿರುವ ಲಘು ಯುದ್ಧ ಹೆಲಿಕಾಪ್ಟರ್‌ಗಳ ಮೊದಲ ಬ್ಯಾಚ್ನ ಕಾಪ್ಟರ್ಸ್ ಸೇನೆಗೆ ಸೇರ್ಪಡೆಯಾಗಿದೆ. 15 ರಲ್ಲಿ 10 ವಾಯುಸೇನೆಗೆ ಸೇರ್ಪಡೆಯಾಗಿದ್ದು, 5 ಭೂಸೇನೆಗೆ ನೀಡಲಾಯಿತು. ವಿವಿಧ ವ್ಯಾಪ್ತಿಯ ಕ್ಷಿಪಣಿ ಮತ್ತು ಇತರ ಶಸ್ತ್ರಾಸ್ತ್ರಗಳನ್ನು ಲಾಂಚ್ ಮಾಡಲು ಸೇನೆಗೆ ಈ ಕಾಪ್ಟರ್‌ಗಳು ಹೆಚ್ಚಿನ ಬಲ ನೀಡಲಿವೆ.
ಹೆಚ್ಎಎಲ್ ಈ ಯುದ್ಧವಿಮಾನಗಳನ್ನು ಅಭಿವೃದ್ಧಿಪಡಿಸಿದ್ದು, ಸುಮಾರು 3 ಸಾವಿರದ 887 ಕೋಟಿ ರೂಪಾಯಿ ವೆಚ್ಚದಲ್ಲಿ ಈ ಹೆಲಿಕಾಪ್ಟರ್‌ಗಳನ್ನ ತಯಾರಿಸಿದೆ. ಇವುಗಳನ್ನು ಅತಿ ಎತ್ತರದ ಪ್ರದೇಶದಲ್ಲೂ ನಿಯೋಜನೆ ಮಾಡಲು ಅನುಕೂಲವಾಗುವಂತೆ ವಿನ್ಯಾಸ ಮಾಡಲಾಗಿದೆ.
ಸಂಪೂರ್ಣ ದೇಶಿಯ ತಂತ್ರಜ್ಞಾನದಲ್ಲಿ ಹೆಚ್ಎಎಲ್ ಈ ಹೆಲಿಕಾಪ್ಟರ್‌ಗಳನ್ನ ನಿರ್ಮಾಣ ಮಾಡಿದೆ. 2 ಜೋಡಿ ಎಂಜಿನ್‌ ಗಳನ್ನು ಈ ಕಾಪ್ಟರ್ ಗಳು ಹೊಂದಿದ್ದು, 5.8 ಟನ್ ತೂಕವನ್ನ ಹೊಂದಿವೆ. 20 ಎಂಎಂ ಟರೆಂಟ್‌ ಗನ್, 70 ಎಂಎಂ ಕ್ಷಿಪಣಿಯನ್ನೂ ಸಿಡಿಸುವ ಸಾಮರ್ಥ್ಯವನ್ನು ಕೂಡ ಹೊಂದಿದೆ.
ಅತಿ ಎತ್ತರ ಪ್ರದೇಶವಾದ ಸಿಯಾಚಿನ್‌ನಲ್ಲೂ ದಾಳಿ ಮಾಡುವ ಹಾಗೂ ಮರುಭೂಮಿಯಲ್ಲೂ ಸಮರ್ಥವಾಗಿ ದಾಳಿ ನಡೆಸುವ ಬಲವನ್ನ ಈ ಲೈಟ್ ಕೋಂಬ್ಯಾಟ್ ಹೆಲಿಕಾಪ್ಟರ್‌ಗಳು ಹೊಂದಿವೆ. ಈಗಾಗಲೇ ಎಲ್ಲಾ ರೀತಿಯ ಶಸ್ತ್ರಾಸ್ತ್ರಗಳ ಫೈರಿಂಗ್‌ ಟೆಸ್ಟ್‌ಗಳಲ್ಲಿ ಎಲ್‌ಸಿಹೆಚ್ ಕಾಪ್ಟರ್‌ಗಳು ಯಶಸ್ವಿಯಾಗಿ ಸೇನಾ ಬಲವನ್ನು ಇಮ್ಮಡಿಗೊಳಿಸಿದೆ.
