ಸಿದ್ದಾಪುರ: ಶಿಕ್ಷಕರ ದಿನಾಚರಣೆ ಹಿನ್ನೆಲೆಯಲ್ಲಿ ಸಿದ್ದಾಪುರ ತಾಲೂಕಾ ಪ್ರಾಥಮಿಕ ಶಾಲಾ ಶಿಕ್ಷಕರ ಸಂಘದ ವತಿಯಿಂದ ನೀಡಲಾಗುವ ಡಾ. ಎ.ಪಿ.ಜೆ ಅಬ್ದುಲ್ ಕಲಾಂ ಉತ್ತಮ ಶಿಕ್ಷಕ ಪ್ರಶಸ್ತಿ ಪಡೆದ ಆರು ಶಿಕ್ಷಕರು ಹಾಗೂ 20 ಜನ ನಿವೃತ್ತ ಶಿಕ್ಷಕರನ್ನು ಪಟ್ಟಣದ ಶಂಕರಮಠದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಆತ್ಮೀಯವಾಗಿ ಸನ್ಮಾನಿಸಲಾಯಿತು.
ತಾಲೂಕಾ ಉತ್ತಮ ಶಿಕ್ಷಕ ಪ್ರಶಸ್ತಿಗೆ ಭಾಜನರಾದ ಅವರಗುಪ್ಪಾ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಯ ಮುಖ್ಯ ಶಿಕ್ಷಕಿ ಪ್ರತಿಭಾ ನಿಲೇಕಣಿ, ನೆಜ್ಜೂರು ಸಹಿಪ್ರಾ ಶಾಲೆಯ ಉಮೇಶ ನಾಗು ನಾಯ್ಕ, ಹಂಜಗಿ ಸಕಿಪ್ರಾ ಶಾಲೆಯ ಉಮಾ ಭಟ್, ಸಿದ್ದಾಪುರ ಸಹಿಪ್ರಾ ಉರ್ದು ಶಾಲೆಯ ನಸ್ರಿನ್ ಬಾನು, ಕಂಚಿಕೈ ಸಕಿಪ್ರಾ ಶಾಲೆಯ ಪ್ರೇಮಾ ನಾಯ್ಕ ಹಾಗೂ ವಾಟಗಾರ ಸಕಿಪ್ರಾ ಶಾಲೆಯ ಪ್ರಭಾಕರ ಭಂಡಾರಿ ಅವರನ್ನು ಹಾಗೂ ನಿವೃತ್ತ ಶಿಕ್ಷಕರನ್ನು ವಿಧಾನಸಭಾಧ್ಯಕ್ಷ ವಿಶ್ವೇಶ್ವರ ಹೆಗಡೆ ಕಾಗೇರಿ ಸನ್ಮಾನಿಸಿದರು.
ಇನ್ನು ಕಾರ್ಯಕ್ರಮದಲ್ಲಿ ಎಸ್.ಎಸ್.ಎಲ್.ಸಿ ಪರೀಕ್ಷೆಯಲ್ಲಿ 100% ಫಲಿತಾಂಶ ಪಡೆದ ವಿದ್ಯಾರ್ಥಿಗಳು, 14 ಸರ್ಕಾರಿ ಪ್ರೌಢಶಾಲೆಯ ಮುಖ್ಯ ಶಿಕ್ಷಕರು, ಎಸ್.ಎಸ್.ಎಲ್.ಸಿಯಲ್ಲಿ ತಾಲೂಕಿಗೆ ಗರಿಷ್ಠ ಅಂಕ ಗಳಿಸಿದ ಆರು ವಿದ್ಯಾರ್ಥಿಗಳು, ಇನ್ ಸ್ಪಾಯರ್ಡ್ ಅವಾರ್ಡ್ ಪಡೆದ ಇಬ್ಬರು ವಿದ್ಯಾರ್ಥಿಗಳು, ಮಾಸ್ಟರ್ ಅಥ್ಲಿಟ್ ಪುರಸ್ಕಾರ ಪಡೆದ ಇಬ್ಬರು ಶಿಕ್ಚಕರು ಹಾಗೂ ಸರ್ಕಾರಿ ನೌಕರರ ಕ್ರೀಡಾಕೂಟದಲ್ಲಿ ವಿಜೇತರಾದ ಮೂವರು ಶಿಕ್ಷಕರನ್ನು ಗೌರವಿಸಲಾಯಿತು.
