ಹೊನ್ನಾವರ: ತಾಲೂಕಿನ ಮೂಡ್ಕಣಿಯಲ್ಲಿ ಸಾರ್ವಜನಿಕ ಗಣೇಶೋತ್ಸವದ ಪ್ರಯುಕ್ತ ಶುಕ್ರವಾರ ರಾತ್ರಿ ನಡೆದ ನಾಟಕದಲ್ಲಿ ಅದ್ಭುತ ಕಲಾ ಪ್ರತಿಭೆ ಮೆರೆದು ಪ್ರೇಕ್ಷಕರ ಮನಗೆದ್ದಿದ್ದ ನಾಟಕ ಕಲಾವಿದ, ಉದ್ಯಮಿ ಉದಯ ನಾಯ್ಕ ಮೂಡ್ಕಣಿ ಶನಿವಾರ ಬೆಳಿಗ್ಗೆ ಹೃದಯಘಾತದಿಂದ ಸಾವನ್ನಪ್ಪಿದ್ದಾರೆ.
ತಾಲೂಕಿನ ಒಬ್ಬ ಅದ್ಭುತ ರಂಗಭೂಮಿ ಕಲಾವಿದರಾಗಿ, ಎಲ್ಲೇ ನಾಟಕ ನಡೆದರೂ ಖಳನಾಯಕ, ಕಥಾನಾಯಕ ಇನ್ನುಳಿದ ಪಾತ್ರಕ್ಕೆ ಬಣ್ಣ ಹಚ್ಚಿ, ಪಾತ್ರಕ್ಕೆ ಜೀವ ತುಂಬುತ್ತಿದ್ದರು. ಶುಕ್ರವಾರ ನಡೆದ ನಾಟಕದಲ್ಲಿಯೂ ಕೂಡ ತನ್ನ ಕೊನೆಯ ಅದ್ಭುತ ಅಭಿನಯದ ಮೂಲಕ ಪ್ರೇಕ್ಷಕರ ಮನಸೂರೆಗೊಳ್ಳುವಲ್ಲಿ ಯಶಸ್ವಿಯಾಗಿದ್ದರು. ಇದೆ ನಾಟಕದಲ್ಲಿ ಇವರ ಸಹೋದರ ಸತೀಶ್ ನಾಯ್ಕ ಮತ್ತು ವಿನಾಯಕ ನಾಯ್ಕ ಕೂಡ ಪಾತ್ರ ನಿರ್ವಹಿಸಿದ್ದರು.
ಉದಯ ನಾಯ್ಕ ವೃತ್ತಿಯಲ್ಲಿ ಕೃಷಿಕನಾಗಿ ಗುತ್ತಿಗೆ ಕೂಡ ಮಾಡುತ್ತಿದ್ದರು, ಸಾಮಾಜಿಕವಾಗಿ ಎಲ್ಲ ಸಮಾಜದವರೊಂದಿಗೂ ಅನ್ಯೋನ್ಯವಾಗಿದ್ದರು. ಮೃತ ಉದಯ ನಾಯ್ಕ ಪತ್ನಿ, ಮಗ, ಮಗಳು ಅಪಾರ ಬಂದುಬಳಗವನ್ನು ಅಗಲಿದ್ದಾರೆ.
