ಭೋಪಾಲ್: ಅಕ್ರಮ ಆಸ್ತಿ ಗಳಿಕೆ ಆರೋಪದಡಿ ಜಬಲ್ ಪುರದ ಆರ್ ಟಿಒ ಅಧಿಕಾರಿಯ ಮನೆ ಮೇಲೆ ಬುಧವಾರ ರಾತ್ರಿ ಆರ್ಥಿಕ ಅಪರಾಧ ದಳ ದಾಳಿ ನಡೆಸಿದ್ದು, ಬೃಹತ್ ಪ್ರಮಾಣದ ಆಸ್ತಿ ಪತ್ತೆಯಾಗಿರುವುದಾಗಿದೆ.
ಮೂಲಗಳ ಪ್ರಕಾರ, ಜಬಲ್ ಪುರದ ಶತಾಬ್ದಿ ಪುರಂ ಕಾಲೋನಿಯಲ್ಲಿರುವ ಆರ್ ಟಿಒ ಸಂತೋಷ್ ಪಾಲ್ ನಿವಾಸದಲ್ಲಿ ಆತನ ಆದಾಯಕ್ಕಿಂತ 650 ಪಟ್ಟು ಹೆಚ್ಚು ಮೌಲ್ಯದ ಆಸ್ತಿಯನ್ನು ಆರ್ಥಿಕ ಅಪರಾಧ ದಳ ಪತ್ತೆ ಹಚ್ಚಿದೆ. ಇನ್ನು ಪಾಲ್ ಪತ್ನಿ ಕೂಡಾ ಆರ್ ಟಿಒ ಇಲಾಖೆಯಲ್ಲಿ ಕ್ಲರ್ಕ್ ಆಗಿ ಕಾರ್ಯನಿರ್ವಹಿಸುತ್ತಿರುವುದಾಗಿ ತಿಳಿದುಬಂದಿದೆ.
ಆರ್ಥಿಕ ಅಪರಾಧ ದಳ ದಾಳಿ ನಡೆಸಿದ್ದ ಸಂದರ್ಭದಲ್ಲಿ ಪಾಲ್ ಮನೆಯಲ್ಲಿ 16 ಲಕ್ಷ ರೂಪಾಯಿ ನಗದು, ಲಕ್ಷಾಂತರ ರೂ. ಮೌಲ್ಯದ ಚಿನ್ನಾಭರಣಗಳು, ಐಶಾರಾಮಿ ಕಾರುಗಳು, ಹಲವು ಇನ್ನಿತರ ದಾಖಲೆಗಳು ಪತ್ತೆಯಾಗಿದ್ದು, ಮನೆಯಲ್ಲಿ ಮಿನಿ ಥಿಯೇಟರ್ ಇದ್ದಿರುವುದಾಗಿ ಅಧಿಕಾರಿಗಳು ತಿಳಿಸಿದ್ದಾರೆ.
ಆದಾಯಕ್ಕಿಂತ ಹಲವು ಪಟ್ಟು ಹೆಚ್ಚು ಅಕ್ರಮ ಆಸ್ತಿ ಗಳಿಸಿರುವುದಾಗಿ ಆರ್ ಟಿಒ ಸಂತೋಷ್ ಪಾಲ್ ಮತ್ತು ಆತನ ಪತ್ನಿ, ಕ್ಲರ್ಕ್ ರೇಖಾ ಪಾಲ್ ವಿರುದ್ಧ ದೂರು ಬಂದಿರುವುದಾಗಿ ಆರ್ಥಿಕ ಅಪರಾಧ ದಳದ ಎಸ್ಪಿ ದೇವೇಂದ್ರ ಪ್ರತಾಪ್ ಸಿಂಗ್ ಸುದ್ದಿಗಾರರ ಜತೆ ಮಾತನಾಡುತ್ತ ತಿಳಿಸಿದ್ದಾರೆ.
