ಜಖೌ (ಗುಜರಾತ್): ಪ್ರಕೃತಿ ವಿಕೋಪದ ಹೆಸರನ್ನು ಮಕ್ಕಳಿಗೆ ಇಡುವ ಪ್ರವೃತ್ತಿ ಇಂದು ನಿನ್ನೆಯದ್ದಲ್ಲ. ಇದೀಗ ಸುದ್ದಿಯಲ್ಲಿರುವ ಚಂಡಮಾರುತದ ಹೆಸರು ಬಿಪೋರ್ಜಾಯ್ ಗುರುವಾರ ಗುಜರಾತ್ ಕರಾವಳಿಗೆ ಬಿಪೋರ್ಜಾಯ್ ಚಂಡಮಾರುತ ಅಪ್ಪಳಿಸಲಿದೆ ಎಂದು ಭಾರತೀಯ ಹವಾಮಾನ ಇಲಾಖೆ ಹೇಳಿದೆ. ಅಂದಹಾಗೆ ಗುಜರಾತ್ನ ಮಹಿಳೆಯೊಬ್ಬರು ತಮ್ಮ ಒಂದು ತಿಂಗಳ ಮಗಳಿಗೆ ‘ಬಿಪೋರ್ಜಾಯ್ ’ ಎಂದು ಹೆಸರಿಡಲು ನಿರ್ಧರಿಸಿದ್ದಾರೆ. ಈ ಕುಟುಂಬ ಈಗ ಕಚ್ ಜಿಲ್ಲೆಯ ಜಖೌನ ಆಶ್ರಯ ಕೇಂದ್ರದಲ್ಲಿದೆ. ಬಿಪೋರ್ಜಾಯ್ ಚಂಡಮಾರುತ ಗುಜರಾತಿಗೆ ಅಪ್ಪಳಿಸುವ ನಿರೀಕ್ಷೆ ಇದ್ದು, ಸುರಕ್ಷಿತ ಸ್ಥಳಗಳಿಗೆ ಸ್ಥಳಾಂತರಿಸಲ್ಪಟ್ಟ ಸಾವಿರಾರು ಜನರಲ್ಲಿ ಈ ಕುಟುಂಬವೂ ಸೇರಿದೆ.
ಈ ಹಿಂದೆಯೂ ಹಲವಾರು ಮಂದಿ ಚಂಡಮಾರುತದ ಹೆಸರುಗಳನ್ನು ಮಕ್ಕಳಿಗೆ ಇಟ್ಟಿದ್ದಾರೆ. ತಿತ್ಲಿ,ಫನಿ ಮತ್ತು ಗುಲಾಬ್ ಹೀಗೆ ಹೆಸರುಗಳ ಪಟ್ಟಿ ಮುಂದುವರಿಯುತ್ತದೆ.
ಆದಾಗ್ಯೂ, ಬಿಪೋರ್ಜಾಯ್ ಎಂಬ ಪದದ ಅರ್ಥ ವಿಪತ್ತು. ಈ ಹೆಸರನ್ನು ಬಾಂಗ್ಲಾದೇಶ ನೀಡಿದ್ದು, 2020 ರಲ್ಲಿ ವಿಶ್ವ ಹವಾಮಾನ ಸಂಸ್ಥೆ ದೇಶಗಳು ಈ ಹೆಸರನ್ನು ಅನುಮೋದಿಸಿದ್ದವು.
ಕೋವಿಡ್ ಸಾಂಕ್ರಾಮಿಕ ಸಮಯದಲ್ಲಿ, ಉತ್ತರ ಪ್ರದೇಶದ ಗೋರಖ್‌ಪುರದಲ್ಲಿ ನವಜಾತ ಶಿಶುವಿಗೆ ಕರೋನಾ ಎಂದು ಹೆಸರಿಸಲಾಯಿತು. ಇಷ್ಟೇ ಅಲ್ಲ ಆಂಧ್ರಪ್ರದೇಶದ ಕಡಪಾ ಜಿಲ್ಲೆಯ ಇತರ ಇಬ್ಬರು ಮಕ್ಕಳಿಗೆ ವೈರಸ್‌ನ ಹೆಸರನ್ನು ಇಡಲಾಗಿದೆ. ಕೊರೊನಾ ಹೊತ್ತಲ್ಲಿ ರಾಜಸ್ಥಾನದ ದಂಪತಿಗಳು ತ್ರಿಪುರಾದಲ್ಲಿ ಸಿಲುಕಿಕೊಂಡಿದ್ದರು. ಕೋವಿಡ್ ಹರಡುವಿಕೆಯನ್ನು ನಿಯಂತ್ರಿಸಲು ಸರ್ಕಾರ ವಿಧಿಸಿದ ನಿರ್ಬಂಧಗಳ ನಂತರ ತಮ್ಮ ಗಂಡು ಮಗುವಿಗೆ “ಲಾಕ್‌ಡೌನ್” ಎಂದು ಹೆಸರಿಟ್ಟಿದ್ದರು. ಮುಂಬೈನಿಂದ ಉತ್ತರ ಪ್ರದೇಶವನ್ನು ತಲುಪಲು ರೈಲು ಪ್ರಯಾಣ ಮಾಡುತ್ತಿದ್ದಾಗ ಜನಿಸಿದ ಮಗುವಿಗೂ ಲಾಕ್‌ಡೌನ್ ಎಂಬ ಹೆಸರಿಡಲಾಗಿತ್ತು.
