ಜೊಯಿಡಾ: ಮನೆಯ ಸಮೀಪದಲ್ಲಿ ಮೇಯಲು ಹೊಗಿದ್ದ ದನಕರುಗಳನ್ನು ತರುತ್ತಿರುವ ವೇಳೆ ವ್ಯಕ್ತಿಯೊಬ್ಬನ ಮೇಲೆ ಕರಡಿ ದಾಳಿ ಮಾಡಿ ಗಾಯಗೊಳಿಸಿರುವ ಘಟನೆ ಬಾಪೇಲಿ ಗ್ರಾಮದಲ್ಲಿ ಶುಕ್ರವಾರ ಸಂಜೆ ನಡೆದಿದೆ. ಕಾಳು ಬಾಬು ಪಾಟೀಲ (51) ಗಾಯಗೊಂಡ ವ್ಯಕ್ತಿ.
ಹುಲ್ಲು ಮೇಯಲು ಹೊಗಿದ್ದ ತನ್ನ ಸಾಕು ದನಕರುಗಳನ್ನು ತರುತ್ತಿರುವ ವೇಳೆ ಎರಡು ಮರಿಗಳೊಂದಿಗೆ ಇದ್ದ ಕರಡಿ ಈತನ ಮೇಲೆ ಎರಗಿ ಕೈ ಬೆರಳಿಗೆ ಕಚ್ಚಿ ಗಾಯಗೊಳಿಸಿದ್ದು, ಈತ ಕೆಳಗೆ ಬಿದ್ದು ಕೂಗಿಕೊಂಡಾಗ ಕರಡಿ ಕಾಡಿಗೆ ತನ್ನ ಮರಿಗಳೊಂದಿಗೆ ಓಡಿ ಹೋಗಿದೆ ಎಂದು ತಿಳಿದು ಬಂದಿದೆ.
ನಂತರ ಅರಣ್ಯ ಇಲಾಖೆಯ ಡಿ ಆರ್ ಎಪ್ ಓ ವಿಠ್ಠಲ ಗುಬಚೆ ಮತ್ತು ಗಾರ್ಡ ಪ್ರಶಾಂತ ಬಾಗಿ ಇವರು ಜೊಯಿಡಾ ತಾಲೂಕಾ ಆಸ್ಪತ್ರೆಗೆ ಗಾಯಗೊಂಡ ವ್ಯಕ್ತಿಯನ್ನು ತಂದು ಚಿಕಿತ್ಸೆ ಕೊಡಿಸಿದ್ದಾರೆ.
