ಭಟ್ಕಳ, ಮೇ- 05 : ಮುರುಡೇಶ್ವರ ಪ್ರವಾಸಕ್ಕೆ ಬಂದು ಸಮುದ್ರದಲ್ಲಿ ಈಜಲು ತೆರಳಿದ್ದ ವೇಳೆ ಇಬ್ಬರು ಯುವಕರು ಸಮುದ್ರದಲ್ಲಿ ಮುಳುಗಿ ನೀರುಪಾಲಾದ ಘಟನೆ ಮುರುಡೇಶ್ವರ ಸಮುದ್ರ ತೀರದಲ್ಲಿ ರವಿವಾರ ಸಂಜೆ ನಡೆದಿದೆ.
ಓರ್ವ ಮೃತ ಯುವಕನನ್ನು ಇಸ್ಮಾಯಿಲ್ ಮೊಹ್ಮದ ಬರ್ಮಾವರ್ (24) ಭಟ್ಕಳ ಅಜಾದ್ ನಗರ ನಿವಾಸಿ, ಇನ್ನೋರ್ವ ಯುವಕ ಖಲೀಲ್ (13) ಹಾವೇರಿ ಜಿಲ್ಲೆಯ ಹಿರೇಕೆರೂರು ನಿವಾಸಿ ಎಂದು ತಿಳಿದು ಬಂದಿದೆ. ಶಿವಮೊಗ್ಗ ಜಿಲ್ಲೆಯ ಸಾಗರ ತಾಲೂಕಿನ ಮದರಸದಿಂದ ಸುಮಾರು 18 ಯುವಕರು ಮುರುಡೇಶ್ವರ ಪ್ರವಾಸಕ್ಕೆ ಬಂದಿದ್ದರು.
ಇವರಿಗೆ ಭಟ್ಕಳ ಮೂಲದ ಮೃತ ಯುವಕ ಇಸ್ಮಾಯಿಲ್ ಮೊಹ್ಮದ ಬರ್ಮಾವರ್ ಸ್ನೇಹಿತನಾಗಿದ್ದ. 18 ಜನ ಯುವಕರೊಂದಿಗೆ ಈತ ರವಿವಾರ ಮುರುಡೇಶ್ವರಕ್ಕೆ ತೆರಳಿದ್ದು. ಸಂಜೆ ವೇಳೆ ಸಮುದ್ರದಲ್ಲಿ ಈಜಲು ತೆರಳಿದ್ದಾರೆ. ಈ ವೇಳೆ ನಾಲ್ಕು ಯುವಕರು ಅಲೆಗಳ ರಭಸಕ್ಕೆ ಕೊಚ್ಚಿ ಹೋಗಿದ್ದು ಇಬ್ಬರನ್ನು ರಕ್ಷಣೆ ಮಾಡಲಾಗಿದ್ದು, ಇನ್ನಿಬ್ಬರು ಯುವಕರನ್ನು ದೋಣಿಯ ಸಹಾಯದಿಂದ ದಡಕ್ಕೆ ಕರೆ ತಂದು ಆಸ್ಪತ್ರೆಗೆ ಕರೆದುಕೊಂಡು ಹೋಗುವ ವೇಳೆ ಸಾವನ್ನಪ್ಪಿದ್ದಾರೆ. ಘಟನ ಸ್ಥಳಕ್ಕೆ ಮುರುಡೇಶ್ವರ ಪೊಲೀಸರು ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ.
