ಮುಂಡಗೋಡ: ತಾಲೂಕಿನ ಯರೆಬೈಲ್ ಗ್ರಾಮದ ಗೌಳಿ ಸಮುದಾಯದ ಬಾಲಕ ವಿಠ್ಠಲ ರಾಮು ಪಾಂಡರಮೀಸೆ ಎಂಬವನು ನವೋದಯದ ಶಾಲೆಗೆ ಆಯ್ಕೆಯಾಗಿದ್ದಾನೆ. ಈ ಗ್ರಾಮದಲ್ಲಿ ಗೌಳಿ ಸಮುದಾಯದವರೇ ಹೆಚ್ಚಿನ ಸಂಖ್ಯೆಯಲ್ಲಿದ್ದಾರೆ. ಹೈನುಗಾರಿಕೆ ಹಾಗೂ ಕೃಷಿಯನ್ನು ಮಾಡಿಕೊಂಡು ಜೀವನ ನಡೆಸುವ ಗೌಳಿ ಸಮುದಾಯದ ಈ ಬಾಲಕ ನವೋದಯದ ವಿದ್ಯಾಲಯಕ್ಕೆ ಆಯ್ಕೆಯಾಗಿರುವುದು ಇಡೀ ಗ್ರಾಮವೆ ಸಂತಸ ಪಡುವಂತಾಗಿದೆ.
ಬಾಲಕನ ತಂದೆ ಹೈನುಗಾರಿಕೆ ಮಾಡುತ್ತಿದ್ದು ಇವರ ಕುಟುಂಬದಲ್ಲಿ ಐದನೆಯ ತರಗತಿಗಿಂತ ಹೆಚ್ಚಿನ ಶಿಕ್ಷಣವನ್ನು ಯಾರೂ ಪಡೆದಿಲ್ಲ. ಇದೀಗ ಈ ಬಾಲಕ ಕಠಿಣವಾದ ಪರಿಶ್ರಮದಿಂದ ನವೋದಯದ ಸ್ಪರ್ಧಾತ್ಮಕ ಪರೀಕ್ಷೆ ಬರೆದು ಪಾಸಾಗಿರುವುದು ಕುಟುಂಬಸ್ಥರು, ಗ್ರಾಮಸ್ಥರಿಗೆ ಹಾಗೂ ಶಿಕ್ಷಕರಿಗೆ ಸಂತಸವುಂಟಾಗಿದೆ.
