ಕಾರವಾರ: ಜೋಯಿಡಾ ತಾಲೂಕಿನ ಅನಮೋಡ ಚೆಕ್‌ಪೋಸ್ಟ್ನಲ್ಲಿ ಅಕ್ರಮವಾಗಿ ಸಾಗಿಸಲಾಗುತ್ತಿದ್ದ ಗೋವಾ ಮದ್ಯವನ್ನು ಅಬಕಾರಿ ಅಧಿಕಾರಿಗಳು ವಶಕ್ಕೆ ಪಡೆದು ಓರ್ವ ಆರೋಪಿಯನ್ನು ಬಂಧಿಸಿದ್ದಾರೆ. ಜೋಯಿಡಾ ತಾಲೂಕಿನ ಕ್ಯಾಸಲ್ ರಾಕ್ ಗೌಳಿವಾಡದ ವಿಲಾಸ ಲಕ್ಷ್ಮಣ ಗೌಳಿ ಬಂಧಿತ ಆರೋಪಿ.
ಈತ ಗೋವಾ ಕಡೆಯಿಂದ ಕರ್ನಾಟಕದತ್ತ ಬೊಲೆರೊ ವಾಹನದಲ್ಲಿ ಅಕ್ರಮವಾಗಿ 12 ಲೀ. ಬಿಯರ್ ಸಾಗಾಟ ಮಾಡುತ್ತಿದ್ದಾಗ ಖಚಿತ ಮಾಹಿತಿ ಪಡೆದ ಅಬಕಾರಿ ಅಧಿಕಾರಿಗಳು ವಾಹನವನ್ನು ತಡೆದು ಮದ್ಯ ಹಾಗೂ ವಾಹನವನ್ನು ವಶಕ್ಕೆ ಪಡೆದು ಆರೋಪಿಯನ್ನು ಬಂಧಿಸಿದ್ದಾರೆ. ವಾಹನ ಹಾಗೂ ಮದ್ಯದ ಒಟ್ಟೂ ಮೌಲ್ಯ 3,83,328 ಲಕ್ಷ ರೂ. ಎಂದು ಅಬಕಾರಿ ಉಪ ಆಯುಕ್ತೆ ವನಜಾಕ್ಷಿ ಎಂ. ತಿಳಿಸಿದ್ದಾರೆ.
ಯಲ್ಲಾಪುರ ಉಪ ವಿಭಾಗದ ಅಬಕಾರಿ ಉಪ ಅಧೀಕ್ಷಕ ಶಂಕರಗೌಡ ಪಾಟೀಲ ಅವರ ಮಾರ್ಗದರ್ಶನದಲ್ಲಿ ನಡೆದ ಈ ದಾಳಿಯಲ್ಲಿ ಅಬಕಾರಿ ಉಪನಿರೀಕ್ಷಕ ಶ್ರೀಕಾಂತ ಬಿ. ಅಸೋದೆ, ಅಬಕಾರಿ ಪೇದೆಗಳಾದ ರಾಜು ಭಟ್ಕಲ, ಉಳವಪ್ಪ ತುಳಜಿ ಪಾಲ್ಗೊಂಡಿದ್ದರು.
