ಬೀಜಿಂಗ್: ಟೇಕ್‍ಆಫ್ ವೇಳೆ ವಿಮಾನದ ಟಯರ್ ಸಿಡಿದು ಸಿಬ್ಬಂದಿ ಸೇರಿ 11 ಜನರು ಗಾಯಗೊಂಡ ಘಟನೆ ಹಾಂಗ್‍ಕಾಂಗ್‍ನ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ನಡೆದಿದೆ.
ಕ್ಯಾಥೆ ಪೆಸಿಫಿಕ್‍ನ ಸಿಎಕ್ಸ್-880 ವಿಮಾನವು ಶನಿವಾರ ಮಧ್ಯರಾತ್ರಿ ಲಾಸ್ ಏಂಜಲೀಸ್‍ಗೆ ಹೊರಟಿತ್ತು. ವಿಮಾನದಲ್ಲಿ 17 ಸಿಬ್ಬಂದಿ ಹಾಗೂ 293 ಪ್ರಯಾಣಿಕರಿದ್ದರು. ಟಯರ್ ಸಿಡಿಯುತ್ತಿದ್ದಂತೆ 5 ಎಸ್ಕೇಪ್ ಸ್ಲೈಡ್‍ಗಳನ್ನು ಬಳಸಿ ಪ್ರಯಾಣಿಕರನ್ನು ಹೊರಗೆ ಕರೆತರಲಾಯಿತು. ಬಳಿಕ ಮುನ್ನೆಚ್ಚರಿಕೆ ಕ್ರಮವಾಗಿ ಪ್ರಯಾಣಿಕರನ್ನು ಸ್ಥಳಾಂತರಿಸಲಾಯಿತು ಎಂದು ವಿಮಾನಯಾನ ಸಂಸ್ಥೆ ತಿಳಿಸಿದೆ.
ಗಾಯಗೊಂಡ ಪ್ರಯಾಣಿಕರಿಗೆ ಚಿಕಿತ್ಸೆ ನೀಡಲಾಗುತ್ತಿದೆ. ಅಲ್ಲದೇ ಗಾಯಗೊಂಡ ಸಿಬ್ಬಂದಿ ಹಾಗೂ ಪ್ರಯಾಣಿಕರಿಗೆ ಚಿಕಿತ್ಸೆ ನೀಡುವುದು ನಮ್ಮ ಜವಾಬ್ದಾರಿ ಎಂದು ಸಂಸ್ಥೆ ಹೇಳಿದೆ. ಟೈರ್ ಸಿಡಿಯಲು ಕಾರಣ ಏನೆಂದು ವಿಮಾನಯಾನ ಸಂಸ್ಥೆ ಬಹಿರಂಗಪಡಿಸಿಲ್ಲ. ಆದರೆ ಪೊಲೀಸರು ಟಯರ್ ಬಿಸಿಯಾಗಿ ಸಿಡಿದಿದೆ ಎಂದಿದ್ದಾರೆ.
ಘಟನೆ ನಡೆದ ವಿಮಾನದಲ್ಲಿದ್ದ ಸ್ಥಳೀಯ ನಟಿ ಸೆಲೆನಾ ಲೀ ಸ್ಜೆ-ವಾ ಅವರು ತಮ್ಮ ಅನುಭವವನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ. ಅಲ್ಲದೇ ಘಟನೆಯಲ್ಲಿ ಯಾರಿಗೂ ಗಂಭೀರ ಗಾಯಗಳಾಗಿಲ್ಲ ಎಂದು ತಿಳಿಸಿದ್ದಾರೆ.
