ಬೆಂಗಳೂರು: ಬಿಗ್ ಬಾಸ್ ಶೋ ಗೆಲ್ಲಬೇಕು ಎನ್ನುವ ಆಸೆಯಿಂದಲೇ ಎಲ್ಲರೂ ದೊಡ್ಮನೆಗೆ ಕಾಲಿಡುತ್ತಾರೆ. ಇದೇ ಮೊದಲ ಬಾರಿಗೆ ಒಟಿಟಿಯಲ್ಲಿ ಕನ್ನಡದ ಬಿಗ್ ಬಾಸ್ ಶೋ ಪ್ರಸಾರವಾಗಿದೆ. ಈ ಶೋನಲ್ಲಿ ಟಾಪ್ 4 ಸ್ಥಾನ ಪಡೆದವರಿಗೆ ಮಾತ್ರ ಬಿಗ್ ಬಾಸ್ ಕನ್ನಡ ಸೀಸನ್ 9 ಟಿವಿ ಆವೃತ್ತಿಗೆ ಚಾನ್ಸ್ ಸಿಗುತ್ತದೆ ಎಂದು ಮೊದಲೇ ತಿಳಿಸಲಾಗಿತ್ತು. ಆದರೆ 8 ಮಂದಿ ಫಿನಾಲೆ ವಾರದವರೆಗೂ ಬಂದಿದ್ದು, ನಾಲ್ವರು ಕೊನೇ ಕ್ಷಣದಲ್ಲಿ ಹೊರನಡೆದಿದ್ದಾರೆ.
ಜಯಶ್ರೀ ಆರಾಧ್ಯ, ಜಶ್ವಂತ್ ಬೋಪಣ್ಣ, ಸೋಮಣ್ಣ ಮಾಚಿಮಾಡ ಮತ್ತು ಸೋನು ಶ್ರೀನಿವಾಸ್ ಗೌಡ ಅವರು ಫಿನಾಲೆ ವಾರದಲ್ಲಿ ಶೋದಿಂದ ಔಟ್ ಆಗಿದ್ದಾರೆ. ಇನ್ನುಳಿದ ಸ್ಪರ್ಧಿಗಳಾದ ಆರ್ಯವರ್ಧನ್ ಗುರೂಜಿ, ರೂಪೇಶ್ ಶೆಟ್ಟಿ, ರಾಕೇಶ್ ಅಡಿಗ ಮತ್ತು ಸಾನ್ಯಾ ಅಯ್ಯರ್ ಗೆದ್ದು ಬಿಗ್ ಬಾಸ್ ಕನ್ನಡ ಸೀಸನ್ 9 ರ ಟಿವಿ ಆವೃತ್ತಿಗೆ ಚಾನ್ಸ್ ಪಡೆದಿದ್ದಾರೆ.
ಜಯಶ್ರೀ ಆರಾಧ್ಯ ಅವರು ಸತತ 5 ವಾರವೂ ನಾಮಿನೇಟ್ ಆಗಿದ್ದರೂ ಸಹ ವೀಕ್ಷಕರ ವೋಟ್ ಪಡೆದು ತಮ್ಮ ಸ್ಥಾನ ಉಳಿಸಿಕೊಂಡಿದ್ದರು. ಆದರೆ ಫಿನಾಲೆ ವಾರದಲ್ಲಿ ನಿರೀಕ್ಷಿತ ಮಟ್ಟದಲ್ಲಿ ವೋಟ್ ದೊರೆಯದ ಕಾರಣ ಅವರ ಬಿಗ್ ಬಾಸ್ ಪಯಣ ಕೊನೆಗೊಂಡಿದೆ. ಕನ್ನಡ ಸರಿಯಾಗಿ ಬರದ ಕಾರಣಕ್ಕೆ ಜಶ್ವಂತ್ ಬೋಪಣ್ಣನನ್ನು ವೀಕ್ಷಕರು ಹೆಚ್ಚಾಗಿ ಇಷ್ಟಪಟ್ಟಿಲ್ಲ ಎನಿಸುತ್ತದೆ. ಆದರೂ ಫಿನಾಲೆ ವಾರದವರೆಗೂ ಪೈಪೋಟಿ ನೀಡಿದ್ದಾರೆ. ಅಂತಿಮವಾಗಿ ಅವರು ಕೂಡ ಹೆಚ್ಚಿನ ವೋಟ್ ಪಡೆಯದ ಕಾರಣ ಬಿಗ್ ಬಾಸ್ ಆಟ ಮುಗಿಸಿದ್ದಾರೆ.
ಅದೇ ರೀತಿ ಸೋಮಣ್ಣ ಮಾಚಿಮಾಡ ಕೂಡ ಕೊನೇ ವಾರದಲ್ಲಿ ಶೋದಿಂದ ಔಟ್ ಆಗಿದ್ದಾರೆ. ದೊಡ್ಮನೆಯಲ್ಲಿ ಹೆಚ್ಚು ಮನರಂಜನೆ ನೀಡಲು ಅವರಿಗೆ ಸಾಧ್ಯವಾಗದ ಕಾರಣಕ್ಕಾಗಿ ಹೆಚ್ಚು ವೋಟ್ ಸಿಕ್ಕಿಲ್ಲ ಎನ್ನಲಾಗುತ್ತಿದೆ. ಸೋನು ಶ್ರೀನಿವಾಸ್ ಗೌಡ ಕೊನೇ ಹಂತದವರೆಗೂ ಆತ್ಮವಿಶ್ವಾಸ ಉಳಿಸಿಕೊಂಡು ಫೈನಲ್ ನಲ್ಲಿ ಸಾನ್ಯಾ ಐಯ್ಯರ್ ಪೈಪೋಟಿ ಕೊಟ್ಟಿದ್ದರು. ಕಡೆಗೂ ಸೋನು ಗೌಡ ಟಿವಿ ಸೀಸನ್ಗೆ ಹೋಗಬೇಕು ಎಂದುಕೊಂಡಿದ್ದ ಕನಸು ಭಗ್ನವಾಗಿದೆ.
