ನವದೆಹಲಿ: ಬಾಲಿವುಡ್ ನಟ ಸುಶಾಂತ್ ಸಿಂಗ್ ರಾಜಪೂತ್ ಅವರ ಸಾವು ಮತ್ತೊಮ್ಮೆ ಚರ್ಚೆಗೆ ಗ್ರಾಸವಾಗಿದೆ. ಸುಶಾಂತ್ ಆತ್ಮಹತ್ಯೆ ಮಾಡಿಕೊಂಡಿಲ್ಲ, ಇಬ್ಬರು ವ್ಯಕ್ತಿಗಳು ಅವರನ್ನು ಕೊಂದಿದ್ದಾರೆ ಎಂದು ನಟನ ಸಹೋದರಿ ಶ್ವೇತಾ ಸಿಂಗ್ ಕಿರ್ತಿ ಗಂಭೀರ ಆರೋಪ ಮಾಡಿದ್ದಾರೆ.
ಮಾತನಾಡಿದ ಅವರು, “ಅಮೆರಿಕಾ ಮತ್ತು ಮುಂಬೈನ ಇಬ್ಬರು ಮನಶಾಸ್ತ್ರಜ್ಞರು ನನ್ನನ್ನು ಸಂಪರ್ಕಿಸಿ, ಸುಶಾಂತ್ ಅವರ ಸಾವಿನ ಹಿಂದೆ ಸಂಚು ಇದೆ ಎಂದು ಹೇಳಿದ್ದಾರೆ. ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ ಎನ್ನುವುದಕ್ಕೆ ಯಾವುದೇ ದೃಢವಾದ ಕಾರಣಗಳಿಲ್ಲ. ಅವನು ನೇಣು ಹಾಕಿಕೊಳ್ಳಲು ಬಳಸಿದ ಸ್ಥಳದಲ್ಲಿ ಫ್ಯಾನ್ ಮತ್ತು ಹಾಸಿಗೆಯ ನಡುವಿನ ಅಂತರ ತುಂಬಾ ಕಡಿಮೆ ಇತ್ತು. ಅಲ್ಲಿ ಸ್ಟೂಲ್ ಕೂಡ ಇರಲಿಲ್ಲ. ಹಾಗಾದರೆ ಆತ್ಮಹತ್ಯೆ ಹೇಗೆ ಸಾಧ್ಯ?” ಎಂದು ಪ್ರಶ್ನಿಸಿದ್ದಾರೆ.
ಅವರು ಇನ್ನೂ ಮುಂದುವರಿಸಿ, “ಸುಶಾಂತ್ ಕುತ್ತಿಗೆಯ ಮೇಲೆ ಕಂಡುಬಂದ ಗುರುತುಗಳು ಬಟ್ಟೆಯಿಂದ ಉಂಟಾದಂತಿರಲಿಲ್ಲ, ಅದು ಸರಪಳಿಯ ಗುರುತುಗಳಂತಿತ್ತು. ಈ ಕಾರಣದಿಂದಲೇ ಆತ್ಮಹತ್ಯೆ ಎಂಬ ನಂಬಿಕೆ ನನಗೆ ಬಂದಿಲ್ಲ. ನನ್ನನ್ನು ಸಂಪರ್ಕಿಸಿದ ಇಬ್ಬರು ಮನಶಾಸ್ತ್ರಜ್ಞರು ಸುಶಾಂತ್ನ್ನು ಗುರುತಿಸುವವರಲ್ಲ, ಆದರೆ ಇಬ್ಬರೂ ಒಂದೇ ಮಾತು ಹೇಳಿದ್ದಾರೆ — ಸುಶಾಂತ್ನ್ನು ಇಬ್ಬರು ವ್ಯಕ್ತಿಗಳು ಕೊಂದಿದ್ದಾರೆ” ಎಂದು ಶ್ವೇತಾ ಹೇಳಿದ್ದಾರೆ.
ಅವರ ಪ್ರಕಾರ, ಸುಶಾಂತ್ನ್ನು ಭಾವನಾತ್ಮಕ ಮತ್ತು ಮಾನಸಿಕವಾಗಿ ಕುಗ್ಗಿಸಲು ಪ್ರಯತ್ನ ಮಾಡಲಾಗಿತ್ತು. “ಅವನು ಪ್ರತಿಭಾಶಾಲಿ, ಶ್ರಮಶೀಲ ಮತ್ತು ವೇಗವಾಗಿ ಯಶಸ್ಸಿನ ಮೆಟ್ಟಿಲೇರಿದ. ಆದರೆ ಕೆಲವರಿಗೆ ಅದು ಸಹಿಸಲಿಲ್ಲ. ಆ ಕಾರಣದಿಂದ ಅವನ ವಿರುದ್ಧ ಸಂಚು ರೂಪಿಸಲಾಯಿತು” ಎಂದು ಹೇಳಿದ್ದಾರೆ.
ಗಮನಾರ್ಹವಾಗಿ, ಇತ್ತೀಚೆಗಷ್ಟೆ ಸಿಬಿಐ ಸುಶಾಂತ್ ಆತ್ಮಹತ್ಯೆ ಪ್ರಕರಣದಲ್ಲಿ ನಟಿ ಹಾಗೂ ಗೆಳತಿ ರಿಯಾ ಚಕ್ರವರ್ತಿಗೆ ಕ್ಲೀನ್ ಚಿಟ್ ನೀಡಿತ್ತು. ವರದಿ ಪ್ರಕಾರ, ಹಣಕಾಸಿನ ಅವ್ಯವಹಾರ ಅಥವಾ ಆತ್ಮಹತ್ಯೆಗೆ ಪ್ರಚೋದನೆ ಎನ್ನುವ ಯಾವುದೇ ಸಾಕ್ಷ್ಯ ದೊರಕಿಲ್ಲ. ರಿಯಾ ಚಕ್ರವರ್ತಿ ಘಟನೆಯ 6 ದಿನಗಳ ಮುಂಚೆಯೇ ಸುಶಾಂತ್ನ ಅಪಾರ್ಟ್ಮೆಂಟ್ನಿಂದ ಹೊರಟಿದ್ದರು ಎಂದು ಸಿಬಿಐ ವರದಿ ಹೇಳಿದೆ.
