ಫ್ರಾನ್ಸ್ನ ಖ್ಯಾತ ಕಾಲ್ಚೆಂಡು ಚತುರ ಕಿಲಿಯನ್ ಎಂಬಾಪ್ಪೆ ಹೊಸ ಕ್ಲಬ್ ಪರ ಕಣಕ್ಕಿಳಿಯುವುದು ಬಹುತೇಕ ಖಚಿತವಾಗಿದೆ. ಏಕೆಂದರೆ ಪ್ರಸ್ತುತ ಕ್ಲಬ್ ಪ್ಯಾರಿಸ್ ಸೇಂಟ್ ಜರ್ಮೈನ್ (PSG) ಅವರನ್ನು ಟ್ರಾನ್ಸ್ಫರ್ ಸೇಲ್ಗೆ ಇರಿಸಿದ್ದಾರೆ. ಇತ್ತ ಎಂಬಾಪ್ಪೆಯ ಹೆಸರು ಟ್ರಾನ್ಸ್ಫರ್ ಪಟ್ಟಿಯಲ್ಲಿ ಕಾಣಿಸಿಕೊಳ್ಳುತ್ತಿದ್ದಂತೆ ಅತ್ತ ಸೌದಿ ಅರೇಬಿಯಾ ಖ್ಯಾತ ಫುಟ್ಬಾಲ್ ಕ್ಲಬ್ ಅಲ್-ಹಿಲಾಲ್ ಬರೋಬ್ಬರಿ 300 ಮಿಲಿಯನ್ ಯೂರೋ ಬಿಡ್ ಸಲ್ಲಿಸಿದ್ದಾರೆ ವರದಿಯಾಗಿದೆ. ಅಂದರೆ ಭಾರತೀಯ ರೂಪಾಯಿ ಮೌಲ್ಯ ಸುಮಾರು 2,718 ಕೋಟಿ ರೂ.
ಈ ಟ್ರಾನ್ಸ್ಫರ್ ಡೀಲ್ ಯಶಸ್ವಿಯಾದರೆ ಫುಟ್ಬಾಲ್ ಇತಿಹಾಸದಲ್ಲೇ ಅತ್ಯಧಿಕ ಮೊತ್ತಕ್ಕೆ ವರ್ಗಾವಣೆಗೊಂಡ ಆಟಗಾರ ಎಂಬ ವಿಶ್ವ ದಾಖಲೆ ಕಿಲಿಯನ್ ಎಂಬಾಪ್ಪೆ ಎಂಬಾಪ್ಪೆ ಪಾಲಾಗಲಿದೆ. ಇದಕ್ಕೂ ಮುನ್ನ ಬ್ರೆಝಿಲ್ನ ನೇಮರ್ ಜೂನಿಯರ್ ದಾಖಲೆ ಮೊತ್ತಕ್ಕೆ ಟ್ರಾನ್ಸ್ಫರ್ ಆಗಿದ್ದರು.
2017 ರಲ್ಲಿ ಬರ್ಸಿಲೋನಾ ಫುಟ್ಬಾಲ್ ಕ್ಲಬ್ ನೇಮರ್ ಅವರನ್ನು 222 ಮಿಲಿಯನ್ ಯೂರೋಗೆ ಪ್ಯಾರಿಸ್ ಸೇಂಟ್ ಜರ್ಮೈನ್ ಕ್ಲಬ್ಗೆ ಟ್ರಾನ್ಸ್ಫರ್ ಮಾಡಿದ್ದರು. ಇದೀಗ ಎಂಬಾಪ್ಪೆಗಾಗಿ ಅಲ್ ಹಿಲಾಲ್ ಕ್ಲಬ್ 300 ಮಿಲಿಯನ್ ಯೂರೋಗೆ ಬಿಡ್ ಸಲ್ಲಿಸಿದ್ದು, ಈ ಡೀಲ್ ಸಕ್ಸಸ್ ಆದರೆ ಹೊಸ ದಾಖಲೆ ನಿರ್ಮಾಣವಾಗಲಿದೆ.
PSG ಎಂಬಾಪ್ಪೆಯನ್ನು ಕೈ ಬಿಡುತ್ತಿರುವುದೇಕೆ?
ಈ ವರ್ಷದ ಸೀಸನ್ನೊಂದಿಗೆ ಕಿಲಿಯನ್ ಎಂಬಾಪ್ಪೆ ಹಾಗೂ PSG ನಡುವಣ ಒಪ್ಪಂದ ಮುಗಿಯಲಿದೆ. ಆದರೆ ಇದಕ್ಕೂ ಮುನ್ನವೇ ಯುರೋಪ್ನ ಮತ್ತೊಂದು ಖ್ಯಾತ ಫುಟ್ಬಾಲ್ ಕ್ಲಬ್ ರಿಯಲ್ ಮ್ಯಾಡ್ರಿಡ್ ಎಂಬಾಪ್ಪೆಗೆ ತೆರೆ ಮರೆಯಲ್ಲಿ ಬಿಗ್ ಆಫರ್ ನೀಡಿದೆ ವರದಿಯಾಗಿದೆ. ಇದೇ ಕಾರಣದಿಂದಾಗಿ PSG ಜೊತೆಗಿನ ಒಪ್ಪಂದವನ್ನು ಮುಂದುವರಿಸಲು ಎಂಬಾಪ್ಪೆ ಆಸಕ್ತಿ ತೋರಿಸಿಲ್ಲ.
ಇತ್ತ ಎಂಬಾಪ್ಪೆ ಹಾಗೂ PSG ಜೊತೆಗಿನ ಒಪ್ಪಂದ ಇನ್ನೂ ಒಂದು ಸೀಸನ್ವರೆಗೆ ಬಾಕಿ ಇದೆ. ಈ ಅವಧಿಯೊಳಗೆ ಯುವ ಆಟಗಾರನನ್ನು ಬೇರೊಂದು ಕ್ಲಬ್ಗೆ ವರ್ಗಾವಣೆ ಮಾಡಲು PSG ತಂಡದ ಮಾಲೀಕರು ನಿರ್ಧರಿಸಿದ್ದಾರೆ. ಹೀಗಾಗಿ ಕೈಲಿಯನ್ ಎಂಬಾಪ್ಪೆಯನ್ನು ಟ್ರಾನ್ಸ್ಫರ್ಗೆ ಇರಿಸಲಾಗಿದ್ದು, ಇದೀಗ ಫೆಂಚ್ ಆಟಗಾರನ ಖರೀದಿಗೆ ಸೌದಿಯ ಅಲ್ ಹಿಲಾಲ್ ಕ್ಲಬ್ ಮುಂದೆ ಬಂದಿದೆ. ಈ ಡೀಲ್ ಯಶಸ್ವಿಯಾದರೆ ಕಿಲಿಯನ್ ಎಂಬಾಪ್ಪೆ ಒಂದು ವರ್ಷದವರೆಗೆ ಅಲ್ ಹಿಲಾಲ್ ಪರ ಕಣಕ್ಕಿಳಿಯಬಹುದು.
