ಮಹೇಂದ್ರ ಸಿಂಗ್ ಧೋನಿ ಬಳಿ ಎಷ್ಟು ಬೈಕ್‌ಗಳಿವೆ? ಧೋನಿ ಬಳಿ ಎಷ್ಟು ಕಾರುಗಳಿವೆ?, ಯಾವ್ಯಾವ ಬೈಕ್‌ಗಳಿವೆ?, ಯಾವ ವಾಹನಗಳಿವೆ? ಎಂಬ ಕುತೂಹಲ ಪ್ರತಿಯಬ್ಬ ಅಭಿಮಾನಿಗಳಿಗಿತ್ತು. ಇದೀಗ ಮೊಟ್ಟಮೊದಲ ಬಾರಿಗೆ ಎಂಎಸ್ ಧೋನಿಯ ಗ್ಯಾರೇಜ್ ಜಗತ್ತಿನ ಮುಂದೆ ಬಂದಿದೆ. ಧೋನಿ ಅವರ ಗ್ಯಾರೇಜ್‌ನಲ್ಲಿ ಇರುವಷ್ಟು ಬೈಕ್‌ಗಳು ಭಾರತದ ಯಾವುದೇ ಶೋರೂಂನಲ್ಲಿಲ್ಲ. ಇತ್ತೀಚಿನ ದಿನಗಳಲ್ಲಿ ರಸ್ತೆಯಲ್ಲಿ ಕಾಣದ ಕೆಲ ಕಾರುಗಳ ಸಂಗ್ರಹ ಧೋನಿ ಬಳಿಯಿದೆ. ಇದನ್ನು ಕಂಡು ಧೋನಿಯ ಅಭಿಮಾನಿಗಳು ಮಾತ್ರವಲ್ಲದೆ ಅನೇಕರು ಶಾಕ್ ಆಗಿದ್ದಾರೆ.
ಧೋನಿಯ ಬೈಕ್ ಪ್ರೀತಿ ನಮಗೆಲ್ಲ ಗೊತ್ತೇ ಇದೆ, ಆದರೆ ಮೊದಲ ಬಾರಿಗೆ ಅವರ ಬಳಿ ಇರುವ ಬೈಕ್, ಕಾರುಗಳ ವಿಡಿಯೋ ಜಗತ್ತಿನ ಮುಂದೆ ಬಂದಿದೆ. ಭಾರತದ ಮಾಜಿ ಕ್ರಿಕೆಟಿಗರಾದ ವೆಂಕಟೇಶ್ ಪ್ರಸಾದ್ ಮತ್ತು ಸುನಿಲ್ ಜೋಶಿ ಧೋನಿ ಶೋರೂಮ್ನ ವಿಡಿಯೋವನ್ನು ತೆರೆದಿಟ್ಟಿದ್ದಾರೆ. 90 ರ ದಶಕದಲ್ಲಿ ಭಾರತ ಪರ ಆಡಿದ ಆಟಗಾರರು ರಾಂಚಿಗೆ ತೆರಳಿದ್ದ ಸಂದರ್ಭ ಧೋನಿಯ ಫಾರ್ಮ್ ಹೌಸ್ಗೂ ಭೇಟಿ ನೀಡಿದ್ದಾರೆ. ಅಲ್ಲಿ ಧೋನಿ ಗ್ಯಾರೇಜ್ ನೋಡಿದ ವೆಂಕಿ ಹಾಗೂ ಜೋಶಿಗೆ ಶಾಕ್ ಆಗಿದೆ.
ವೆಂಕಟೇಶ್ ಪ್ರಸಾದ್ ಅವರು ಒಂದು ನಿಮಿಷ 49 ಸೆಕಂಡ್ಗಳ ವಿಡಿಯೋವನ್ನು ಹಂಚಿಕೊಂಡಿದ್ದು, ಇದರಲ್ಲಿ ಧೋನಿ ಅವರ ಪತ್ನಿ ಸಾಕ್ಷಿ, ಧೋನಿಯ ಫಾರ್ಮ್‌ಹೌಸ್‌ ತೋರಿಸುತ್ತಿರುವುದು ಸೆರೆ ಆಗಿದೆ. ಧೋನಿ ಬೈಕ್, ಕಾರುಗಳ ಕಲೆಕ್ಷರ್ ಇದರಲ್ಲಿದೆ. ಈ ಬಗ್ಗೆ ಬರೆದುಕೊಂಡಿರುವ ವೆಂಕಿ, “ಧೋನಿಯವರಲ್ಲಿ ನಾನು ನೋಡಿದ ಅದಮ್ಯ ಉತ್ಸಾಹ ಇದು. ಅಬ್ಬಾ ಏನು ಈ ಕಲೆಕ್ಷನ್. ಧೋನಿ ಒಬ್ಬ ದೊಡ್ಡ ಸಾಧಕ ಮತ್ತು ವಿಶೇಷವಾದ ವ್ಯಕ್ತಿ. ಇದು ಧೋನಿಯ ರಾಂಚಿ ಮನೆಯಲ್ಲಿ ಇರುವ ಬೈಕ್ ಮತ್ತು ಕಾರುಗಳ ಸಂಗ್ರಹದ ವಿಡಿಯೋದೆ,” ಎಂದು ಪ್ರಸಾದ್ ಟ್ವೀಟ್ ಮಾಡಿದ್ದಾರೆ.
ಧೋನಿ ಗ್ಯಾರೇಜ್‌ನಲ್ಲಿ ಹೊಸ ಮತ್ತು ಹಳೆಯ ಬೈಕ್‌ಗಳ ಸಂಗ್ರಹ ಕಂಡುಬಂದಿದೆ. ಪ್ರತಿಯೊಂದು ಬ್ರಾಂಡ್‌ನ ಬೈಕ್‌ಗಳು ಒಂದೊಂದು ವಿಶೇಷತೆ ಹೊಂದಿದೆಯಂತೆ. ಬೈಕ್‌ಗಳ ವ್ಯಾಪಕ ಸಂಗ್ರಹದ ಹೊರತಾಗಿ, ಧೋನಿ ವಿಂಟೇಜ್ ಕಾರುಗಳನ್ನು ಸಹ ಹೊಂದಿದ್ದಾರೆ. ಇವುಗಳಲ್ಲಿ ಕೆಲವು ಧೋನಿ ಆಮದು ಮಾಡಿಕೊಂಡ ಕಾರುಗಳಾಗಿದ್ದರೆ ಇನ್ನೂ ಕೆಲವು ಅವರು ಭಾರತೀಯ ಸೇನೆಯಿಂದ ಖರೀದಿಸಿದ್ದಾರೆ. ಪ್ರಮುಖ ವಿಚಾರ ಎಂದರೆ ಸ್ವತಃ ಧೋನಿ ಅವರೇ ಈ ಗ್ಯಾರೇಜ್‌ನಲ್ಲಿರುವ ಎಲ್ಲಾ ಬೈಕ್‌ಗಳನ್ನು ನೋಡಿಕೊಳ್ಳುತ್ತಾರೆ, ಅವುಗಳನ್ನು ಸರ್ವಿಸ್ ಮಾಡುತ್ತಾರೆ.
