ನವದೆಹಲಿ: ಭಾರತದ ನಗರಗಳಲ್ಲಿ ರಸ್ತೆ ಸಂಚಾರ ಎಂದರೆ — ಗಿಜಿಗುಟ್ಟುವ ವಾಹನಗಳು, ಟ್ರಾಫಿಕ್ ಜಾಮ್, ಮತ್ತು ನಿರಂತರ ಹಾರ್ನ್ ಶಬ್ದಗಳು ಎನ್ನುವುದು ಸಾಮಾನ್ಯ ದೃಶ್ಯ. ಆದರೆ, ಭಾರತೀಯ ಯುವಕನೊಬ್ಬ ಪೋಲೆಂಡ್ನಲ್ಲಿ ಹಾರ್ನ್ ರಹಿತ ವಾಹನ ಸಂಚಾರ ಹೇಗಿರುತ್ತದೆ ಎಂಬುದನ್ನು ಹೇಳಿದ್ದಾರೆ.
ಕುನಾಲ್ ದತ್ ಎಂಬ ಭಾರತೀಯರು – ಪೋಲೆಂಡ್ನ ಬೀದಿಗಳಲ್ಲಿ ವಾಹನಗಳು ಹಾರ್ನ್ ಹಾಕದೇ ಅತ್ಯಂತ ಶಿಸ್ತಿನಿಂದ ಸಂಚರಿಸುತ್ತಿರುವ ದೃಶ್ಯಗಳನ್ನು ತೋರಿಸಿದ್ದಾರೆ. “ಇಲ್ಲಿ ಟ್ರಾಫಿಕ್ ಇದ್ದರೂ ಸಹ ಶಬ್ದ ಮಾಲಿನ್ಯ ಇಲ್ಲ — ಇದು ಭಾರತದ ಬೀದಿಗಳಿಗಿಂತ ಸಂಪೂರ್ಣವಾಗಿ ವಿಭಿನ್ನ,” ಎಂದು ಅವರು ಹೇಳಿದ್ದಾರೆ.
ಕುನಾಲ್, ಭಾರತದಲ್ಲಿ ಅನಗತ್ಯವಾಗಿ ಹಾರ್ನ್ ಹಾಕುವ ಚಾಲಕರ ಮನೋಭಾವದ ವಿರುದ್ಧ ಹಗುರ ವ್ಯಂಗ್ಯವನ್ನೂ ಮಾಡಿದ್ದಾರೆ. ಸದ್ದಿಲ್ಲದೆ ಚಲಿಸುವ ಕಾರುಗಳು, ನಿಯಮ ಪಾಲನೆ ಮಾಡುವ ಚಾಲಕರು — ಈ ಎಲ್ಲವನ್ನು ತೋರಿಸುತ್ತಾ, ಸಂಸ್ಕೃತಿಯ ಅಂತರವನ್ನು ಅವರು ಎತ್ತಿಹಿಡಿದಿದ್ದಾರೆ. ಪೋಲೆಂಡ್ನಲ್ಲಿ ಚಾಲಕರು ಪರಸ್ಪರ ಗೌರವದಿಂದ ಹಾಗೂ ನಿಯಮ ಪಾಲನೆಯಿಂದ ವಾಹನ ಓಡಿಸುತ್ತಾರೆ; ಅಷ್ಟೇ ಅಲ್ಲ, ಹಾರ್ನ್ ಹಾಕುವುದು ಅಸಭ್ಯ ವರ್ತನೆ ಎನ್ನುವ ನಂಬಿಕೆಯೂ ಅಲ್ಲಿ ಇದೆ ಎಂದು ಕುನಾಲ್ ತಿಳಿಸಿದ್ದಾರೆ.
