ಹಾವೇರಿ: ಅಂತರ್ಜಾಲದಲ್ಲಿ ಹಲವು ಬಗೆಯ ವಂಚನೆಗಳು ನಡೆಯುತ್ತಲೇ ಇರುತ್ತವೆ. ಹಿಂದೆಲ್ಲ ಮನೆಗೆ ಬ್ಯಾಂಕ್ಗಳಿಗೆ ಹಣ ಸಾಗಿಸುವ ವಿಷಯ ತಿಳಿದು ದಾಳಿ ಮಾಡುತ್ತಿದ್ದ ಖದೀಮರು ಇದೀಗ ಅಂತರ್ಜಾಲದ ಮೂಲಕ ಜನರ ಹಣ ದೋಚುತ್ತಿದ್ದಾರೆ. ಇದೇ ರೀತಿಯ ಘಟನೆಯೊಂದು ಹಾವೇರಿಯಲ್ಲಿ ನಡೆದಿದೆ.
ಭವಿಷ್ಯವನ್ನು ತಿಳಿದು ಕೊಳ್ಳಲು ತನ್ನ ಮೊಬೈಲ್ನಲ್ಲಿ ಅಪ್ಲಿಕೇಶನ್ ಡೌನಲೋಡ್ ಮಾಡಿಕೊಂಡ ಯುವತಿಯೊಬ್ಬಳು ಬರೋಬ್ಬರಿ 20 ಲಕ್ಷ ರೂಪಾಯಿ ಮೌಲ್ಯದ ಚಿನ್ನ ಕಳೆದುಕೊಂಡಿದ್ದಾಳೆ. ಜ್ಯೋತಿಷ್ಯ ಸಂಬಂಧಿತ ಅಪ್ಲಿಕೇಶನ್ ಡೌನಲೋಡ್ ಮಾಡಿ ಮಾಹಿತಿ ಪಡೆಯಲು ಮುಂದಾದಾಗ ಯುವತಿಗೆ ಇಂತಹ ಮೋಸವಾಗಿದೆ.
ಘಟನೆಯ ಹಿನ್ನೆಲೆ: ತನ್ನ ಮುಂದಿನ ಭವಿಷ್ಯದ ಬಗ್ಗೆ ಕುತೂಹಲ ಹೊಂದಿದ್ದ ಯುವತಿ ಇದಕ್ಕಾಗಿ ಆನ್ಲೈನ್ ಜ್ಯೋತಿಷ್ಯದ ಮೊರೆ ಹೋಗಿದ್ದಳು. ಇದಕ್ಕಾಗಿ ಆಕೆ ಅಪ್ಲಿಕೇಶನ್ವೊಂದನ್ನು ಡೌನ್ಲೋಡ್ ಮಾಡಿಕೊಂಡಿದ್ದಳು. ಅದರಲ್ಲಿ ಜ್ಯೋತಿಷಿಗಳು ಹೇಳಿದಂತೆ ವಿವಿಧ ಪೂಜೆಯನ್ನೂ ಕೂಡಾ ಮಾಡಿಸಿದ್ದಳು. ಅವರು ತಾಯತ ಸಹ ಕಳುಹಿಸಿಕೊಟ್ಟಿದ್ದಳು. ಇದೇ ವೇಳೆ ಯುವತಿಯ ತಂದೆ ತಾಯಿಗೆ ಅಪತ್ತು ಬರಲಿದೆ ಎಂದು ಜ್ಯೋತಿಷಿಗಳು ಯುವತಿಗೆ ಹೇಳಿದ್ದರು.
ನೀವು ಪೂಜೆ ಮಾಡಿಸಿದರೆ ನಿಮಗೆ ಸರ್ಕಾರಿ ಉದ್ಯೋಗ ಸಿಗುತ್ತೆ. ನಿಮಗೆ ಉತ್ತಮ ಆರೋಗ್ಯ, ಒಳ್ಳೆಯ ವರ ಸಿಗುತ್ತಾನೆ, ಜೀವನ ಸುಖಮಯವಾಗುತ್ತದೆ ಎಂದು ನಂಬಿಸಲಾಗಿತ್ತು. ಎಲ್ಲ ಒಳ್ಳೆಯದಾಗಬೇಕು ಎಂದರೆ ನೀವು ಕನಿಷ್ಠ 250 ಗ್ರಾಂ ಚಿನ್ನ ನೀಡಬೇಕು ಅದನ್ನು ನಾವು ದೇವರ ಮುಂದೆ ಇಟ್ಟು ಪೂಜೆ ಮಾಡುತ್ತೇವೆ. ನಂತರ ಅದನ್ನು ನಿಮಗೆ ವಾಪಸ್ ಕೊಡುತ್ತೇವೆ ಎಂದು ನಂಬುವಂತೆ ಮಾಡಿದ್ದಾರೆ.
ಮೋಸ ಹೋಗಿದ್ದು ಅರಿವಾಗಿ ದೂರು ನೀಡಿದ ಯುವತಿ: ಅದರಂತೆ ಯುವತಿ ಮನೆಯಲ್ಲಿನ ಎಲ್ಲ ಬಂಗಾರವನ್ನು ಜ್ಯೋತಿಷಿಗಳು ಕಳಿಸಿದ ವ್ಯಕ್ತಿಗೆ ನೀಡಿದ್ದಾಳೆ. ಬಂಗಾರ ಪಡೆದ ನಂತರ ಜ್ಯೋತಿಷಿಗಳು ಪೋನ್ ಸ್ವಿಚ್ಡ್ ಆಫ್ ಮಾಡಿದ್ದಾರೆ. ಇದರಿಂದ ಹೆದರಿದ ಯುವತಿ ಹಾವೇರಿ ಸೈಬರ್ ಕ್ರೈಂ ಸ್ಟೇಷನ್ನಲ್ಲಿ ದೂರು ದಾಖಲಿಸಿದ್ದಾರೆ. ದೂರು ದಾಖಲಿಸಿಕೊಂಡ ಸೈಬರ್ ಕ್ರೈಂ ಪೊಲೀಸರು ಮೂವರು ಆರೋಪಿಗಳನ್ನು ಬಂಧಿಸಿದ್ದಾರೆ.
