ಬೆಂಗಳೂರು: ಕನ್ನಡ ಬಿಗ್ಬಾಸ್-11ರ ಆವೃತ್ತಿಯ ಸ್ಪರ್ಧಿ ಸುರೇಶ್ ಅಲಿಯಾಸ್ ಗೋಲ್ಡ್ ಸುರೇಶ್ ಅವರು ತಮಗೆ ಜೀವ ಬೆದರಿಕೆ ಕರೆ ಬಂದಿರುವುದಾಗಿ ಪೊಲೀಸರಿಗೆ ದೂರು ನೀಡಿದ್ದು, ಗೋವಿಂದರಾಜನಗರ ಪೊಲೀಸ್ ಠಾಣೆಯಲ್ಲಿ ಗಂಭೀರ ಸ್ವರೂಪವಲ್ಲದ ಪ್ರಕರಣ (ಎನ್ಸಿಆರ್)ದಾಖಲಾಗಿದೆ. ಮೈನುದ್ದೀನ್ ಹಾಗೂ ಸಹಚರರ ವಿರುದ್ಧ ಸುರೇಶ್ ದೂರು ನೀಡಿದ್ದಾರೆ.
ಹೋಮ್ ಇಂಟೀರಿಯಲ್ ಬ್ಯುಸಿನೆಸ್ ಮಾಡುತ್ತಿರುವ ನಾನು, 2017ರಲ್ಲಿ ರಾಯಚೂರಿನ ಮಾನ್ವಿ ತಾಲೂಕಿನಲ್ಲಿ ಇಂಟೀರಿಯಲ್ ಕೆಲಸ ಒಪ್ಪಿಕೊಂಡಿದ್ದೆ. ಈ ಕೆಲಸ ಪೂರ್ಣಗೊಳಿಸಲು ಮೈನುದ್ದೀನ್ಗೆ ವಹಿಸಿದ್ದೆ. ಒಪ್ಪಂದದಂತೆ ಆತ ಕೆಲಸ ಪೂರ್ಣಗೊಳಿಸಲಿರಲಿಲ್ಲ. ಹೀಗಿದ್ದರೂ ಆತನಿಗೆ ಹಣ ಪಾವತಿ ಮಾಡಿದ್ದೆ. ಇದಾದ ಬಳಿಕ ಸ್ವಂತ ವ್ಯವಹಾರ ಮಾಡಿಕೊಂಡಿದ್ದೆ. ಆರೋಪಿ ಕರೆ ಮಾಡಿ ಹೆಚ್ಚು ಹಣ ಸಂಪಾದನೆ ಮಾಡಿದ್ದಿಯಾ, 6 ಲಕ್ಷ ರೂಪಾಯಿ ನೀಡಬೇಕು ಎಂದು ಒತ್ತಾಯಿಸಿ ಜೀವ ಬೆದರಿಕೆ ಹಾಕಿದ್ದಾನೆ. ಕರೆ ಮಾಡಿದ ವ್ಯಕ್ತಿಗೆ ಮನವೊಲಿಸಿ 50 ಸಾವಿರ ರೂಪಾಯಿ ನೀಡಿದ್ದೆ. ಆದರೆ, ಮತ್ತೆ ಕರೆ ಮಾಡಿ 6 ಲಕ್ಷ ಹಣ ನೀಡದಿದ್ದರೆ ಮಾಧ್ಯಮಗಳಲ್ಲಿ ಸುದ್ದಿ ಬಿತ್ತರಿಸಿ ತೇಜೊವಧೆ ಮಾಡುವುದಾಗಿ ಬೆದರಿಸಿದ್ದಾನೆ ಎಂದು ಸುರೇಶ್ ತಿಳಿಸಿದ್ದಾರೆ.
ಈ ಕುರಿತು ಮಾಧ್ಯಮಗೋಷ್ಠಿಯಲ್ಲಿ ಸುರೇಶ್ ಪರ ವಕೀಲ ಗುರುರಾಜ್ ಮಾತನಾಡಿ, “ಸುರೇಶ್ ಇಂಟೀರಿಯರ್ ಬ್ಯುಸಿನೆಸ್ ಮಾಡಿಕೊಂಡಿದ್ದು, ಇಬ್ಬರ ನಡುವೆ 2017ರಲ್ಲಿ 7 ಲಕ್ಷದ ಹಣದ ವ್ಯವಹಾರ ನಡೆದಿದೆ. ಒಪ್ಪಂದದಂತೆ ನಿಗದಿತ ಹಣ ನೀಡಿದ್ದಾರೆ. ಹೀಗಿದ್ದರೂ ಸುರೇಶ್ ಬಿಗ್ಬಾಸ್ಗೆ ಹೋಗಿ ಬಂದ ಮೇಲೆ ಇವರ ಸ್ಟೇಟಸ್ ನೋಡಿ ಮತ್ತೆ ಹಣ ಕೇಳಿದ್ದಾರೆ. ಹಣದ ವಿಷಯವಾಗಿ ಕರೆ ಮಾಡಿ ಬೆದರಿಕೆ ಹಾಕಿದ್ದಾರೆ. ಗೋವಿಂದರಾಜನಗರ ಠಾಣೆಗೆ ದೂರು ಕೊಡಲಾಗಿದೆ” ಎಂದರು.
