ದಾಂಡೇಲಿಯ ಕೆ.ಸಿ.ವೃತ್ತದ ಬಳಿ ನಡು ರಸ್ತೆಯಲ್ಲಿದ್ದ ಬಿಡಾಡಿ ಆಕಳನ್ನು ರಕ್ಷಿಸಲು ಹೋದ ಅಶೋಕ್ ಲೇಲ್ಯಾಂಡ್ ವಾಹನವೊಂದು ಸಿ.ಸಿ ಕ್ಯಾಮೆರಾವಿರುವ ಕಂಬಕ್ಕೆ ಗುದ್ದಿ, ಹಾನಿಯಾಗಿರುವ ಘಟನೆ ನಡೆದಿದೆ.
ಹಳಿಯಾಳ ರಸ್ತೆಯಿಂದ ಬಂದ ಅಶೋಕ್ ಲೇಲ್ಯಾಂಡ್ ವಾಹನವೊಂದು ಬರ್ಚಿ ರಸ್ತೆಗೆ ತಿರುಗುವ ವೇಳೆ, ನಡು ರಸ್ತೆಯಲ್ಲಿ ಬೀಡಾಡಿ ಆಕಳೊಂದು ಅಡ್ಡ ಬಂದಿದೆ. ಅದನ್ನು ತಪ್ಪಿಸುವ ಸಂದರ್ಭದಲ್ಲಿ, ಚಾಲಕನ ನಿಯಂತ್ರಣ ತಪ್ಪಿದ ವಾಹನ, ಕೆ.ಸಿ.ವೃತ್ತದ ಹತ್ತಿರವಿದ್ದ ಸಿ.ಸಿ ಕ್ಯಾಮೆರಾ ಅಳವಡಿಸಿರುವ ಕಂಬಕ್ಕೆ ಗುದ್ದಿ, ಕಂಬ ಸೇರಿದಂತೆ ಸಿ.ಸಿ ಕ್ಯಾಮೆರಾಕ್ಕೂ ಹಾನಿ ಉಂಟಾಗಿದೆ.
ಈ ಸಂದರ್ಭದಲ್ಲಿ ಕೆಲ ಹೊತ್ತು ಸಂಚಾರ ಅಸ್ತವ್ಯಸ್ತಗೊಂಡಿತ್ತು. ತಕ್ಷಣವೇ ಸ್ಥಳಕ್ಕೆ ಆಗಮಿಸಿದ ಎಎಸ್ಐ ನಾರಾಯಣ ರಾಥೋಡ್ ನೇತೃತ್ವದ ಪೊಲೀಸ್ ಸಿಬ್ಬಂದಿಗಳು ಸುಗಮ ಸಂಚಾರಕ್ಕೆ ಅನುವು ಮಾಡಿಕೊಟ್ಟು, ಅಪಘಾತ ಪಡಿಸಿದ ವಾಹನವನ್ನು ಪೊಲೀಸ್ ಠಾಣೆಗೆ ಕಳುಹಿಸಿಕೊಟ್ಟರು.
ಸ್ಥಳಕ್ಕೆ ಹೆಸ್ಕಾಂ ಸಹಾಯಕ ಕಾರ್ಯನಿರ್ವಾಹಕ ಅಭಿಯಂತರರಾದ ದೀಪಕ್ ನಾಯಕ, ಹೆಸ್ಕಾಂ ಶಾಖಾಧಿಕಾರಿ ಪರಶುರಾಮ ಉಪ್ಪಾರ್ ಮತ್ತು ಹೆಸ್ಕಾಂ ಸಿಬ್ಬಂದಿಗಳು ಭೇಟಿ ನೀಡಿದ್ದಾರೆ.
