ಸೋಶಿಯಲ್ ಮೀಡಿಯಾ ಮಾಯಾ ಜಗತ್ತು ಇದ್ದ ಹಾಗೆ. ರಾತ್ರಿ ಕಳೆದು ಬೆಳಗಾಗುವ ವೇಳೆ ಒಬ್ಬ ಸಾಮಾನ್ಯ ವ್ಯಕ್ತಿಯನ್ನ ಸೂಪರ್ ಸ್ಟಾರ್ ಪಟ್ಟಕ್ಕೇರಿಸುವ ಅಸಾಮಾನ್ಯ ಶಕ್ತಿಯನ್ನ ಜಾಲತಾಣಗಳು ಹೊಂದಿದೆ. ಅದು ಧನಾತ್ಮಕವೋ ಋಣಾತ್ಮಕವೋ ಎನ್ನುವ ಗೋಜಿಗೆ ಬೀಳದೇ ಅಂತಹ ವಿಶಿಷ್ಟ ಟ್ಯಾಲೆಂಟ್ ಇರುವವರನ್ನು ಫೇಮಸ್ ಮಾಡಿಬಿಡುತ್ತದೆ.
ಇಂತಹದೇ ಒಂದು ಸಂಗತಿ ಕಳೆದ ಕೆಲ ದಿನಗಳ ಹಿಂದೆ ನಡೆದಿದೆ. ಪ್ರತಿಯೊಬ್ಬರ ಸೋಷಿಯಲ್ ಮೀಡಿಯಾಗಳಲ್ಲೂ ಆತನದೇ ಹವಾ.! ಎಲ್ಲರ ಬರ್ತಡೇ ವಿಷ್ ಸ್ಟೇಟಸ್‌ನಲ್ಲಿ ಕೂಡಾ ಆತನದೇ ವಿಡಿಯೋ.!
ಆತ ಬೇರೆ ಯಾರೂ ಅಲ್ಲ. ಸೋಷಿಯಲ್ ಮೀಡಿಯಾ ಸ್ಟಾರ್ ಕಾಫಿನಾಡು ಚಂದು.! ಕರ್ನಾಟಕದ ಮೂಲೆ ಮೂಲೆಯಲ್ಲೂ ಚಂದುದೇ ಹವಾ.!
ಸೋಶಿಯಲ್ ಮೀಡಿಯಾದಲ್ಲಿ ಚಂದುನ ಹಿಡಿಯೋರೇ ಯಾರಿಲ್ಲ.!
ತಮ್ಮ ವಿಶೇಷ ಕಲೆಯ ಮೂಲಕ ಅದೆಷ್ಟೋ ಎಲೆಮರೆಯ ಕಲಾವಿದರು ಸೋಷಿಯಲ್ ಮೀಡಿಯಾ ಮೂಲಕ ಜನಪ್ರಿಯರಾಗಿದ್ದಾರೆ. ಅಂಥವರ ಸಾಲಿನಲ್ಲಿ ಕಾಫಿನಾಡು ಚಂದು ಕೂಡಾ ಒಬ್ಬರು.
ಹುಟ್ಟುಹಬ್ಬಕ್ಕೆ ತಮ್ಮದೇ ಶೈಲಿಯಲ್ಲಿ ಹಾಡು ಹೇಳುವ ಮೂಲಕ ಸಾಮಾಜಿಕ ಜಾಲತಾಣದಲ್ಲಿ ತುಂಬಾ ಫೇಮಸ್ ಆಗಿದ್ದಾರೆ. ಇತ್ತೀಚೆಗೆ ಕನ್ನಡದ ಹಾಡುಗಳನ್ನು ತನ್ನದೇ ರೀತಿಯಲ್ಲಿ ಹಾಡುವ ಮೂಲಕ ಸ್ಟಾರ್ ಆಗಿದ್ದಾರೆ. ಇನ್‌ಸ್ಟಾಗ್ರಾಂನಲ್ಲಿ ಸ್ಟಾರ್ ಸೆಲೆಬ್ರೆಟಿಗಳಿಗಿಂತ ಹೆಚ್ಚು ಫಾಲೋವರ್ಸ್ಗಳನ್ನು ಹೊಂದುವ ಮೂಲಕ ಎಲ್ಲರ ಮನೆ ಮಾತಾಗಿದ್ದಾರೆ. ಸದ್ಯ ಸೋಶಿಯಲ್ ಮೀಡಿಯಾದಲ್ಲಿ ಫೇಮಸ್ ಇರುವ ಸಂಗೀತ ನಿರ್ದೇಶಕ ಅರ್ಜುನ್ ಜನ್ಯರಿಗಿಂತ ಅಧಿಕ ಫಾಲೋವರ್ಸ್ಗಳನ್ನು ಹೊಂದಿದ್ದಾರೆ.
ಇನ್‌ಸ್ಟಾಗ್ರಾಂನಲ್ಲಿ ಅರ್ಜುನ್ ಜನ್ಯ ಹಿಂದಿಕ್ಕಿದ ಚಂದು.!
ಸ್ಯಾಂಡಲ್‌ವುಡ್ ಫೇಮಸ್ ಮ್ಯೂಸಿಕಲ್ ಕಂಪೋಸರ್ ಅರ್ಜುನ್ ಜನ್ಯರನ್ನು ಕಾಫಿ ನಾಡು ಚಂದು ಹಿಂದಿಕ್ಕಿದ್ದಾರೆ. ಸದ್ಯ ಅರ್ಜುನ್ ಜನ್ಯಗೆ ಇನ್‌ಸ್ಟಾಗ್ರಾಂನಲ್ಲಿ ಸುಮಾರು 1 ಲಕ್ಷದ 94 ಸಾವಿರ ಮಂದಿ ಫಾಲೋವರ್ಸ್ ಇದ್ದಾರೆ. ಹೆಚ್ಚು ಕಡಿಮೆ ಇಬ್ಬರು ಪೋಸ್ಟ್ ಮಾಡಿದ ಸಂಖ್ಯೆ ಒಂದೇ ಇದ್ದು, ಸ್ಯಾಂಡಲ್‌ವುಡ್‌ನ ಖ್ಯಾತ ಸಂಗೀತ ನಿರ್ದೇಶಕರಿಗೆ ಟಕ್ಕರ್ ಕೊಟ್ಟು ಮುಂದೆ ಸಾಗಿದ್ದಾರೆ.
ಶಿವಣ್ಣ, ಪುನೀತ್ ಅಭಿಮಾನಿ ಎನ್ನುತ್ತಲೇ ಗೆದ್ದ ಚಂದು.!
ಚಂದು ಪ್ರಾರಂಭದಿಂದಲೂ ತಾನು ಶಿವಣ್ಣ ಮತ್ತು ಪುನೀತ್ ರಾಜ್‌ಕುಮಾರ್ ಅಭಿಮಾನಿ ಎನ್ನುತ್ತಲೇ ಸೋಶಿಯಲ್ ಮೀಡಿಯಾದಲ್ಲಿ ಫೇಮಸ್ ಆಗಿದ್ದಾರೆ. ತನ್ನದೇ ಶೈಲಿಯಲ್ಲಿ ಹಾಡಿ, ಮನಸ್ಸಿಗೆ ಖುಷಿ ಕೊಟ್ಟಂತೆ ಸಾಹಿತ್ಯ ಹೇಳಿ ಕಾಫಿ ನಾಡು ಚಂದು ಕರ್ನಾಟಕದಾದ್ಯಂತ ಫೇಮಸ್ ಆಗಿದ್ದಾರೆ. ಸೋಶಿಯಲ್ ಮೀಡಿಯಾದಲ್ಲಿ ಇವರ ಪ್ರತಿಯೊಂದು ಹಾಡುಗಳು ವೈರಲ್ ಆಗಿವೆ. ಈ ಮೂಲಕ ಚಂದು ಸಿಕ್ಕಾಪಟ್ಟೆ ಜನಪ್ರಿಯತೆ ಪಡೆದಿದ್ದು, ಕನ್ನಡದ ಬಿಗ್‌ಬಾಸ್ ಸೀಸನ್ 9 ಕ್ಕೆ ಹೋಗಲಿದ್ದಾರೆ ಎಂಬ ಸುದ್ದಿ ಎಲ್ಲೆಡೆ ಹರಿದಾಡುತ್ತಿದೆ.
