ಏಕದಿನ ಕ್ರಿಕೆಟ್ನಲ್ಲಿ 500 ರನ್ಗಳಿಸಲು ಸಾಧ್ಯವೇ? ಸಾಧ್ಯ ಎಂದು ನಿರೂಪಿಸಿದ್ದಾರೆ ಸೆಲಂಗೋರ್ ಅಂಡರ್-19 ತಂಡ. ಮಲೇಷ್ಯಾದ ಅಂಡರ್-19 ಏಕದಿನ ಟೂರ್ನಿಯಲ್ಲಿ ಸೆಲಂಗೋರ್ ಹಾಗೂ ಪುತ್ರಜಯ ತಂಡಗಳು ಮುಖಾಮುಖಿಯಾಗಿದ್ದವು. ಈ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಸೆಲಂಗೋರ್ ತಂಡವು 50 ಓವರ್ಗಳಲ್ಲಿ ಬರೋಬ್ಬರಿ 564 ರನ್ ಕಲೆಹಾಕಿದ್ದಾರೆ.
ಪಂದ್ಯದ ಮೊದಲ ಓವರ್ನಿಂದಲೇ ಪುತ್ರಜಯ ತಂಡದ ಬೌಲರ್ಗಳ ವಿರುದ್ಧ ಸೆಲಂಗೋರ್ ದಾಂಡಿಗರು ಸಿಡಿಲಬ್ಬರದ ಬ್ಯಾಟಿಂಗ್ ಪ್ರದರ್ಶಿಸಿದ್ದರು. ಅದರಲ್ಲೂ ಮುಖ್ಯವಾಗಿ ಮುಹಮ್ಮದ್ ಅಕ್ರಮ್ ವಿಸ್ಫೋಟಕ ಇನಿಂಗ್ಸ್ ಆಡಿದ್ದರು.
ಆರಂಭದಿಂದಲೇ ಬಿರುಸಿನ ಬ್ಯಾಟಿಂಗ್ಗೆ ಒತ್ತು ನೀಡಿದ ಅಕ್ರಮ್ ಪುತ್ರಜಯ ಬೌಲರ್ಗಳ ಬೆಂಡೆತ್ತಿದರು. ಅಲ್ಲದೆ ಕೇವಲ 97 ಎಸೆತಗಳಲ್ಲಿ ಬರೋಬ್ಬರಿ 217 ರನ್ಗಳ ಇನಿಂಗ್ಸ್ ಆಡಿದರು. ಈ ದ್ವಿಶತಕದ ನೆರವಿನೊಂದಿಗೆ ಸೆಲಂಗೋರ್ ತಂಡವು 50 ಓವರ್ಗಳಲ್ಲಿ 6 ವಿಕೆಟ್ ಕಳೆದುಕೊಂಡು 564 ರನ್ ಕಲೆಹಾಕಿತು.
477 ರನ್ಗಳ ಭರ್ಜರಿ ಜಯ:
ಸೆಲಂಗೋರ್ ತಂಡ ನೀಡಿದ 565 ರನ್ಗಳ ಗುರಿ ಬೆನ್ನತ್ತಿದ ಪುತ್ರಜಯ ತಂಡದ ಬ್ಯಾಟರ್ಗಳು ರನ್ಗಳಿಸುವುದಿರಲಿ, ಕ್ರೀಸ್ ಕಚ್ಚಿ ನಿಲ್ಲಲು ಪರದಾಡಿದರು. ಪರಿಣಾಮ 21.5 ಓವರ್ಗಳಲ್ಲಿ ಕೇವಲ 87 ರನ್ಗಳಿಸಿ ಆಲೌಟ್ ಆಯಿತು. ಈ ಮೂಲಕ ಸೆಲಂಗೋರ್ ತಂಡವು ಬರೋಬ್ಬರಿ 477 ರನ್ಗಳ ಅಮೋಘ ಗೆಲುವು ದಾಖಲಿಸಿದೆ.
ಈ ಗೆಲುವಿನೊಂದಿಗೆ ಸೆಲಂಗೋರ್ ತಂಡವು ಮಲೇಷ್ಯಾ ರಾಜ್ಯ ಅಂಡರ್-19 ಟೂರ್ನಿಯಲ್ಲಿ ಅತ್ಯಧಿಕ ರನ್ಗಳ ಅಂತರದಿಂದ ಗೆದ್ದ ತಂಡವೆಂಬ ದಾಖಲೆಯನ್ನು ತಮ್ಮದಾಗಿಸಿಕೊಂಡಿದೆ.
